Li ciammi nna li voschi e li campi di la Sicilia cuntìnuanu e non s’arrinèscinu ad astutari.

Ogni annu videmu lu stissu panurama. Pari ca non ci fussi nenti di fari.

Ma è propiu daccussì?

Pi nuàutri cc’è sempri un responzàbili. La Rigioni dici ca sunnu criminali, si lamenta, ma zoccu a’ fattu nta st’anni pi evitari chi lu nostru chiù granni patrimoniu, la nostra Terra, abbrucia?

Lu dannu: lu dannu ‘un è solo li rischiu di la vita di l’abitanti, chi già è veru gravi, ma è la pèrdita di lu tirrenu. Un tirrenu abbruciatu non è chiù lu stissu di prima. Non tratteni l’acqua, non tratteni la terra di l’erosioni, non pruduci ossìgenu…. Chì cci pozzu fari? Ju sugnu economista e viju la pèrdita irrimediàbili di lu capitali, e l’ambienti è una di li parti chiù mpurtanti di lu nostru capitali.

dilittu? È veru ca cci sunnu cuntratti sempri cu li stissi ditti, ca su’ pagati a còttimu? Chiù ncenni cci su’, chiôssai su’ pagati…. Ma è mai possìbili?

Suluzioni? Secunnu mia manca la vuluntati, o manca la cumpitenza, ma stu problema s’aviss’a mèttiri a lu primu postu di qualunchi polìtica di la Rigioni… Comu? Usannu du’ strummenti: la riprissioni e lu ncintivu.

Riprissioni: Oji cci su’ strumenti capaci di taliari lu tirrenu 24 h supra a 24. Droni, Tilicàmiri, GPS,… ma prima di tutti cci av’ a èssiri la vuluntà di farlu…. Chì stà facennu la Rigioni ncapu a chistu? È veru ca la ditta Ciodue di Carini avìa accattatu un brivettu tidiscu e chi prupunènnulu a la Rigioni a chista non ci ntirissò nenti?

Ncintivu: La Rigioni, p’astutari li fòcura, av’a aviri la so flotta aeria, non cci ànn’a èssiri ntiressi privati… E li privati s’ànn’a pagari lu stissu, pi quannu cc’è focu, e pi quannu non cci nn’è… e accussì puru l’operai di la forestali. Ju ti pagu TOT e macari ti pagu chiôssai si lu ncenniu non cc’è… siddu cc’è lu vai a astutari e ti pagu chiù picca, e chiù cci stai a astutarlu e chiù picca ti pagu. Non si po fari pi liggi? E la canciamu ssa liggi? Chì l’avemu a fari l’Assemblea?

Ma pi fari chistu lu problema è sempri lu stissu. La classi polìtica siciliana s’av’a canciari tutta…

 

0 commenti

Lascia un Commento

Vuoi partecipare alla discussione?
Sentitevi liberi di contribuire!

Lascia un commento