Nucleare

La Rigioni stà dicennu NO, anzi, stà dicennu NI a li scori nucliari in Sicilia.

Meghiu di nenti, certu.

La dicisioni di mèttiri la munnizza nucliari in Sicilia è sulu l’ùtlima vrijogna coloniali. Non àppimu la ndustria nucliari a so tempu. Non âmu avutu mai nudda attinzioni di lu Statu pi li nfrastrutturi e lu sviluppu. Lu Statu avi 30 anni circa ca non ni duna chiù lu FSN (Funnu di Solidarità Nazionali), ma ora s’arricorda di nuàutri picchì ‘un sapi unn’è c’av’a mèttiri ‘a so munnizza?

E chì semu? Lu cistinu di lu fumeri di tutta l’Italia? Pi chistu semu ‘taliani?

Nna sti jorna ntisi prutesti di cu’ dici ca lu Statutu n’addifenni. Putìssimu nvocari l’art. 33 supra la propietà di li mineri o quarchi cosa di lu gèniri?

Purtroppu, secunnu mia cca lu Statutu non n’addifenni assai. Âm’ad aviri l’onestati ntillettuali pi ricanuscillu.

L’art. 32 duna a lu Statu la possibilità di tinìrisi, sparti di zoccu servi pi la difesa nazionali, tutti li beni di “ntiressi nazionali”. Ora, non ci voli nenti pi lu Statu diri ca sarbari li scori nucliari è certamenti un ntiressi nazionali.

Ju aju scrivutu tanti vôti ca sta norma di l’artìculu 22 a’ sirbutu a lu Statu pi fari abusi. Aiju scrivutu e dittu sempri ca ssu ntiressi si po truvari sulu nna li pochi casi in cui un beni s’attrova ‘n Sicilia ma serbi pi tutti li citatini d’Italia, e no sulu picchì si tratta di na strata o un portu o un aeroportu simplicimenti mpurtanti….

Ma cca…. còmu facemu a diri ca l’usu non è “nazionali”?

Cca, perciò, la battaghia av’a èssiri polìtica. Li scori nucliari siciliani cci sunnu, o cci ànnu statu ‘n passatu. Ma un dipòsitu, chi era ‘n Palermu, mi pari ca chiuìu avi circa 10 anni e la % di scori chi  pruducemmu nuàutri è na quantitati mìnima. Quannu lu Statu pinsava, nzinu a l’anni ’70, ca lu nucliari era lu futuru, tannu non pinzau a la Sicilia, tannu lu sviluppu avìa a èssiri ad àutri banni. Ora, ca cc’è di pagari lu costu, v’arricurdati di nuàutri?

Non putemu dari tutti li cruci a lu Statutu, e pinzari ca iddu n’addifenni, specialmenti quannu a iddu non l’addifenni nuddu.

Cca a mia mi pari ca l’ùnica strata è chidda di la mobilitazioni popolari pi fari sèntiri chi non ci stamu chiù. E la minazza di la ndipinnenza si lu Statu aviss’a cuntinuari longu sta strata….

0 commenti

Lascia un Commento

Vuoi partecipare alla discussione?
Sentitevi liberi di contribuire!

Lascia un commento